Hvers vegna umsagnir skipta máli

Gestir styðjast við umsagnir og einkunnir þegar þeir ákveða hvort eignin þín henti þeim. Betri umsagnir og einkunnir geta leitt til fleiri bókana og hærri tekna.

Þú og gesturinn sem bókaði gistinguna hafið 14 daga frá útritun til að skrifa umsögn um reynslu ykkar. Umsagnir eru birtar eftir að báðir aðilar senda inn umsagnir eða eftir að 14 daga umsagnartímabilinu lýkur, hvort sem kemur fyrst.

Gestir geta deilt athugasemdum með:

• Opinberri umsögn. Umsagnir koma fram á skráningarsíðu þinni og við notandalýsingu þína. Ef þú svarar opinberri umsögn birtist svarið beint fyrir neðan hana.
• Einkaathugasemd til gestgjafa. Einungis þú og Airbnb getið séð athugasemd gestsins. Einkaathugasemdir, ásamt umsögnum, geta hjálpað Airbnb að bæta leitarniðurstöður og finna hvaða heimili gestum líka best.

Þær umsagnir sem eiga best við koma sjálfkrafa fyrst. Gestir geta einnig leitað í umsögnum og flokkað eftir nýjustu, hæstu eða lægstu einkunninni.

Líttu á athugasemdir gesta sem tækifæri til að bæta það sem þú býður upp á. Lestu hverja umsögn og svaraðu með uppbyggilegum hætti til að sýna að þú takir athugasemdirnar alvarlega.

Gestir eru beðnir um að gefa 1 til 5 stjörnur í einkunn fyrir heildarupplifun sína og fyrir sex afmarkaða flokka. Heildarupplifun byggir ekki á meðaleinkunn annarra flokka.

Flokkarnir eru:

• Innritun. Hversu auðvelt var að finna eignina og komast inn?
• Hreinlæti. Hve vel var þrifið á heimilinu fyrir komu gesta?
• Nákvæmni. Stóðst eignin væntingar gesta miðað við það sem kom fram í skráningarlýsingunni?
• Samskipti. Hvernig stóð gestgjafinn sig þegar kom að samskiptum frá bókun til útritunar?
• Staðsetning. Hvað fannst gestum um svæðið og hverfið sjálft?
• Virði. Hvernig var virði eignarinnar með tilliti til verðs?

Heildarstjörnueinkunn sem hver gestur gefur birtist við hlið umsagnar viðkomandi. Þegar þrír gestir hafa gefið skráningunni einkunn birtist meðaleinkunn fyrir heildarupplifun í leitarniðurstöðum og á skráningarsíðunni.

Airbnb styðst við einkunnir til að veita viðurkenningar og finna framúrskarandi gestgjafa og skráningar. Það er til dæmis gert með merkingu um ofurgestgjafa og eignir í uppáhaldi hjá gestum.

Ofurgestgjafar fá viðurkenningu fyrir framúrskarandi gestrisni. Ofurgestgjafar verða að halda meðaleinkunn sinni yfir 4,8 stjörnum ásamt því að uppfylla önnur skilyrði.

Ein leið til að minna gesti á að skrifa umsögn er að skrifa umsögn um þá. Umsagnir þínar birtast á notandalýsingu gestsins sem bókaði sem og gesta sem samþykktu að vera hluti af bókuninni. Leggðu þig fram um að:

• Sýna þakklæti. Þetta þarf ekki að vera flóknara en: „Takk fyrir heimsóknina!“
• Veita upplýsingar. Þú gætir t.d. skrifað: „Gesturinn fylgdi útritunarleiðbeiningum okkar í einu og öllu.“
• Koma fram af virðingu. Ræddu um viðkvæm mál í einkaskilaboðum.

Beðið verður um einkunn þína fyrir hreinlæti gesta, samskipti og fylgni við húsreglur hjá þér. Endurgjöf bætir fylgni gesta við grunnreglur en í þeim er gerð krafa um að gestir gangi um heimilið þitt sem sitt eigið og fylgi húsreglunum.

Upplýsingarnar í þessari grein gætu hafa breyst frá birtingu.