Samkennd í verki svo að allir gestir finni að þeir séu velkomnir

Gestaumsjón á Airbnb þýðir að þú opnar eign þína fyrir fólki hvaðanæva að úr heiminum og undirstaða hennar er samkennd. 

Lykillinn að árangri í gestgjafahlutverkinu er að stuðla að því að fólki með ólíkan bakgrunn líði vel meðan á dvölinni stendur. Við einsetjum okkur að bjóða alla gesti velkomna, óháð kynþætti, trúarbrögðum, þjóðernisuppruna, þjóðerni, fötlun, kyni, kynvitund, kynhneigð og aldri — með virðingu og án fordóma og hlutdrægni. 

Gestrisni án aðgreiningar er mikilvægur hluti þess að ná árangri sem gestgjafi. Þetta þýðir að:

• Sýna umburðarlyndi og taka vel á móti öllum gestum, óháð bakgrunni þeirra

• Bjóða upplifun sem byggir á jafnrétti og koma til móts við þarfir gesta 

• Byggja upp tengsl í gegnum það sem gerir fólk líkt og ólíkt

• Tileinka sér opið hugarfar og vilja til að spyrja spurninga til að fá upplýsingar um það sem gestir kunna að þurfa á að halda fyrir dvöl sína

Airbnb tók saman innsýn frá gestgjöfum, gestum og sérfræðingum svo þú getir sýnt samkennd í verki þegar þú tekur á móti gestum og tekið vel á móti hverjum og einum. Frá uppsetningu skráningar til umsagnarskrifa geta þessar ráðleggingar hjálpað þér að draga úr óbeinni hlutdrægni og skapað tengsl.

Með því að taka skýrt fram að þú takir hlýlega á móti fólki með ólíkan bakgrunn getur þú hjálpað gestum úr jaðarsettum hópum að líða vel og veitt þeim hvatningu til að bóka eignina þína. Í gegnum samtöl okkar við gesti höfum við lært að fólk úr þessum samélögum leitar sérstaklega að merkjum um opin viðhorf í skráningarlýsingum áður en gengið er frá bókun. 

Hér eru nokkrir hlutir sem þú getur gert til að gefa til kynna að þú sért gestgjafi sem tekur á móti gestum án aðgreiningar:

• Greindu skýrt frá því í fyrstu setningum skráningarlýsingunnar að þú bjóðir fólk af öllum bakgrunni velkomið (dæmi hér að neðan). 

• Greindu skýrt frá aðgengiseiginleikum eignarinnar og vertu með nýlegar myndir.

• Settu inn persónufornöfn þín (til dæmis: hún, hann, hán) í notandalýsinguna þína. Þetta er leið til að sýna hvernig þú vilt láta ávarpa þig og gefur einnig til kynna að þér sé annt um að nota það persónufornafn sem gestir kjósa.

• Bjóddu hraðbókun til að gera gestum kleift að bóka eignina þína án forsamþykkis. Þetta gefur einnig til kynna að þú getir tekið á móti öllum sem uppfylla bókunarskilyrðin hjá þér.

• Bjóddu forsamþykki og hvettu gesti til að hafa samband við þig fyrir bókun. Við höfum tekið eftir því að gestir hafa stundum samband við gestgjafa áður en þeir bóka til að athuga hvort þeir verði samþykktir og hlýlega verði tekið á móti þeim. 

• Áður en þú hafnar bókunarbeiðni gests skaltu velta ástæðu þess vandlega fyrir þér. Myndi þér líða vel með að útskýra það augliti til auglitis fyrir gestinum þínum?

Þú getur prófað að nota svipaðar yfirlýsingar um fordómaleysi og aðrir gestgjafar nota í skráningum sínum. Við ræddum við meðlimi ráðgjafaráðs gestgjafa til að fá þessi dæmi:

1. Peter frá San Francisco skrifar: „Heimilið mitt er öruggt rými fyrir fólk úr öllum minnihlutahópum og jaðarsettum hópum. Ég tek á móti gestum af öllum kynþáttum, trúarbrögðum, kyni og kynhneigðum.“

2. „Önnur ljósmyndin í skráningunni minni sýnir minnismerki þar sem stendur: „Þú tilheyrir,“ segir Shinya frá Osaka í Japan. Shinya er einnig með ljósmynd þar sem segir: „Ég virði fjölbreytni og samkennd,“ sem yfirlýsingu. Þú getur einnig sett slík skilaboð í myndatexta.

Þegar eignin þín hefur verið bókuð skaltu senda gestum þínum hlýleg kynningarskilaboð. Hér skiptir sköpum að sýna samkennd og hafa opin huga.

• Sérsníddu kynningarskilaboðin þín með upplýsingum úr notandalýsingu gestsins. Þetta geta verið spurningar um áhugasvið viðkomandi, heimabæ og áhugamál.

• Notaðu málfar óháð kyni og kynhneigð þegar þú vísar til gesta þinna. Best er að forðast að draga ályktanir um kyn eða sambandsstöðu fólks.

• Ef gestur spyr út í aðgengisþarfir, skaltu veita svör og spyrja hvort viðkomandi þarfnist einhvers annars. 

Ef þig vantar innblástur getur þú skoðað skilaboð annarra gestgjafa til gesta. Hér eru tvö dæmi:

1. Michael frá Falcarragh á Írlandi segist leggja áherslu á að vera hlýlegur í samskiptum fyrir fram. „Ég þakka gestum alltaf fyrir að óska eftir gistingu í eigninni okkar,“ segir hann. „Þá nefni ég að ég muni hafa samband við viðkomandi þegar nær dregur heimsókninni, óska góðs dags og [segi gestinum] að viðkomandi skuli ekki hika við að hafa samband ef eitthvað vantar í millitíðinni.“

2. Susan frá Denver skrifar: „Heimilið okkar er heimilið þitt. Láttu fara vel um þig. Gerðu þetta rými að þínu eigin. Ef þú ert með hugmyndir til að bæta upplifun gesta okkar skaltu láta okkur vita.“

Gestir, einkum þeir úr jaðarsettum hópum, hafa látið í ljós að eftirfarandi geti orðið til þess að þeim finnist þeir velkomnari:

• Bjóddu sjálfsinnritun þegar þú getur en spurðu gesti hvort þeir vilji frekar innrita sig með aðstoð gestgjafa.
• Ekki heimsækja gesti að óþörfu. Veittu þeim þess í stað næði og gerðu þeim ljóst að þú sért til taks (í eigin persónu eða á Netinu) ef þörf krefur.

Umsagnir eru undirstaða trausts í samfélagi Airbnb. Með því að skrifa umsögn um gesti þína gefst þér tækifæri til að sýna þakklæti og veita gagnlegar athugasemdir. 

• Notaðu sömu staðla til að meta alla gesti. 

• Taktu á móti nýjum gestum á Airbnb þegar þú getur og gefðu þeim umsögn að dvöl lokinni. Að hafa umsögn skiptir miklu máli upp á að gestir geti gengið frá nýjum bókunum.

• Hvettu gesti til að skrifa umsagnir. Við höfum tekið eftir því að ferðalangar úr jaðarsettum samfélögum lesa oft umsagnir áður en þeir bóka til að komast að því hvort tekið hafi verið vel á móti öðrum gestum eins og þeim.

Gættu þess að sýna samkennd í verki, sérstaklega ef þú ert nýr gestgjafi. Þegar kemur að því að taka á móti hverjum sem er skiptir mestu máli að spyrja spurninga sem snúa að þörfum gesta og halda samskiptum opnum. 

Þú getur opnað dyrnar fyrir samkennd með því að spyrja gesti þína einfaldrar spurningar eins og: „Hvað þarftu til að láta þér líða vel í eigninni minni?“ Með þessum hætti getur þú vonandi auðveldað gestum að opna dyrnar hjá þér í bókstaflegum skilningi orðsins og njóta dvalarinnar í eign þinni.