Sjálfbær gestaumsjón fyrir byrjendur

Það er ekki bara gott fyrir plánetuna að sýna umhverfislega ábyrgð sem gestgjafi heldur er það einnig gott fyrir gistireksturinn þinn. Árið 2019 fjölgaði gistingum á vistvænum heimilum um 141 prósent* frá árinu áður.

Til að hjálpa þér að verða sjálfbærari gestgjafi höfum við unnið náið með Umhverfisstofnun Sameinuðu þjóðanna sem leiðir umhverfismál á alþjóðavísu innan Sameinuðu þjóðanna ásamt World Wildlife Fund, helstu verndunarsamtökum heims, til að fá innsýn sérfræðinga. Við höfum einnig tekið saman ráð frá gestgjöfum um allan heim sem tóku einföld en áhrifarík skref til að skipta sköpum.

Lestu áfram til að kynna þér hvernig þú getur skapað sjálfbærari dvöl fyrir gestina þína.

Ef þú eykur orkusparnað eignar þinnar getur það dregið úr þeim auðlindum sem þú notar, lækkað útgjöldin hjá þér og dregið úr kolefnisspori þínu. Hérna eru nokkrar orkusparandi hugmyndir:

• Minntu gesti á að taka tæki úr sambandi þegar þau eru ekki í notkun: Allt að 50%** af orkunni sem farsímar nota kemur frá hleðslutækjum sem eru í sambandi þegar þau eru ekki í notkun.
• Stilltu vatnshitarann þinn: Hefðbundið hitastig vatnshitara er 60 gráður Celsius (140 gráður Fahrenheit). Þú sparar þér orku ef þú lækkar hann í 48-54 gráður Celsius (120-130 gráður Fahrenheit).
• Athugaðu ljósaperurnar þínar: Með því að nota lægsta mögulega rafafl í vöttum getur þú skapað minni hita og dregið úr orkunotkun þinni með tímanum. Orkusparandi ljósaperur eins og CFL og LED nota einnig minni orku og endast lengur** en glóðarperur.
• Gerðu eignina þína veðurhelda: Settu upp veðurstíflu á hurðum og einangraðu glugga til að lækka hita- og kælikostnað.
• Kauptu snjallhitastilla með sjálfvirkum stýringum: Þráðlausir hitastillar gera þér kleift að stjórna hitastigi miðað við komu- og brottfarartíma gesta.
• Leggðu mat á tækin þín: Veldu tæki með háum einkunnum fyrir orkunýtingu þegar komið er að því að kaupa ný tæki.

Endurnýtanlegar hreinlætisvörur og vörur sem hægt er að fylla á er góð leið fyrir flesta til að draga úr umhverfisfótsporum sínum. Hafðu þessar ábendingar í huga til að vera grænni:

• Hættu að nota einnota hreinlætisvörur: Ofurgestgjafinn Anna frá Pembrokeshire í Wales notar þvotthelda og endurnýtanlega svampa og örtrefjaklúta í eldhúsinu í stað einnota pappírsþurrka.
• Notaðu endurunnar pappírsvörur: Veldu 100% endurunnan pappír til að vera umhverfisvænni. Þetta á við allar pappírsvörur sem þú útvegar eins og andlitsþurrkur og salernispappír.
• Minnkaðu notkun á sterkum efnum: Kauptu uppþvottalög, þvottaefni og snyrtivörur sem eru ekki eða lítið eitraðar, náttúrulegar eða lífbrjótanlegar. Í Bordeaux í Frakklandi kaupir ofurgestgjafinn Pascale lífrænar bað- og líkamsvörur frá verslunum á staðnum.
• Skiptu yfir í lífræn textílefni: Þegar komið er að því að skipta um rúmföt og handklæði getur val á lífrænum efnum hjálpað þér að forðast notkun á meindýraeitri, skordýraeitri og öðrum eiturefnum sem eru skaðleg fyrir fólk og vistkerfi.

Þar sem ferskt, hreint vatn er takmörkuð auðlind er mikilvægt að hafa í huga hversu mikið vatn þú og gestir þínir notið, sérstaklega þar sem loftslagsvandinn stuðlar að fleiri þurrkum. Hér eru nokkrar góðar leiðir til að spara vatn:

• Skildu eftir áminningar fyrir gesti: Ef þú styttir sturtuferðina um mínútu geturðu sparað tæpa fjóra lítra** af vatni. Ofurgestgjafinn Antonella í Mílanó á Ítalíu er með miða nálægt krönum sem hvetja gesti til að slökkva á vatninu þegar þeir bursta tennurnar. Þú getur einnig hvatt gesti til að eyða minni tíma í sturtunni.
• Athugaðu hvort það leki: Ef þú skoðar reglulega svæðin í kringum salerni, vaska, baðkör og tæki sem nota vatn getur það hjálpað þér að finna leka. Snjallvatnsmælir getur fylgst með því hversu mikið vatn þú notar og látið þig vita ef óvenjuleg virkni er fyrir hendi, til dæmis ef þú gleymir að slökkva á eldhúskrananum eða ef uppþvottavélin lekur.
• Notaðu skilvirkar stillingar og tæki: Þvottavélar og uppþvottavélar nota mikið vatn. Hvettu gesti til að nota stillingarnar fyrir hrað- eða vistþvott ef slík tæki er að finna í eigninni. Þegar það er komið að því að skipta um vél skaltu velja orkusparandi vél sem notar minna vatn.
• Settu upp tæki með litlu flæði: Þú getur einnig skipt sköpum með því að setja upp krana með litlu flæði og salerni með tvöfaldri sturtun. Í Tasmaníu í Ástralíu er ofurgestgjafinn Merrydith með sérstakan sturtuhaus sem dregur úr vatnsflæði en viðheldur samt miklum þrýstingi.

NÆST: Frekari upplýsingar um endurvinnslu og minnkun úrgangs

*Byggt á innri gögnum Airbnb um fjölgun gesta frá ári til árs í skráningum, þar á meðal sérstökum leitarorðum (vistvæn, vistfræðileg o.s.frv.) í skráningartitlum og -lýsingum frá ágúst 2018 til ágúst 2019

**Úr 60 Actions for the Planet, frá World Wildlife Fund, gefið út 5. mars 2021

Upplýsingarnar í þessari grein gætu hafa breyst frá birtingu.