Fimm leiðir til að næla í bókanir á síðustu stundu

Það kemur fyrir að nætur losni óvænt hjá vinsælustu skráningunum. Þessar fimm ábendingar gætu komið sér vel til að næla í bókanir á síðustu stundu og hámarka tekjurnar.

Með því að bjóða afslátt á síðustu stundu veitir þú gestum hvata til að bóka. Afslátturinn gildir um bókanir sem eru staðfestar 1–28 dögum fyrir innritun. 

Afsláttur sem nemur 10% eða meira af miðgildisverði þínu yfir 60 daga tímabil birtist gestum sérstaklega í leitarniðurstöðum og á skráningarsíðunni. Afsláttarverðið birtist við hliðina á upphaflega verðinu sem er yfirstrikað. 

Svona bætir þú við afslætti á síðustu stundu:

• Opnaðu verðflipann í dagatali skráningarinnar.
• Pikkaðu á aðrir afslættir. 
• Flettu að afsláttum á síðustu stundu og pikkaðu á bæta við afslætti.
• Sláðu inn dagafjölda á milli 1 til 28 fyrir komudag.
• Sláðu inn prósentuafsláttinn sem þú vilt bjóða.

Þú getur breytt afslættinum miðað við hvenær bókun er gerð. Þú gætir til dæmis hækkað prósentuhlutfallið smám saman eftir því sem styttist í innritunardag. 

Þessi afsláttur er ekki í boði þegar kveikt er á snjallverði.

Með því að stytta lágmarksdvöl hjá þér gerir þú gestum kleift að bóka styttri gistingu. 

Svona breytir þú ferðalengd hjá þér:

• Opnaðu framboðsflipann í dagatali skráningarinnar.
• Pikkaðu á lágmarksfjölda gistinátta undir lengd ferðar.
• Breyttu lágmarksdvöl í samræmi við það sem hentar þér.

Þú getur sérsniðið þessa stillingu eftir innritunardegi. Í sumum tilvikum stilla gestgjafar til dæmis aðra lágmarksdvöl fyrir bókanir sem hefjast á föstudegi eða laugardegi en fyrir bókanir sem hefjast á öðrum dögum.

Samanburður á álíka eignum getur komið þér að gagni við að halda verðinu fyrir óbókaðar nætur samkeppnishæfu. Kynntu þér meðalverð sambærilegra eigna á svæðinu fyrir sama tímabil og gerðu mögulega breytingar á gistináttaverðinu hjá þér í samræmi við það.

Svona gerir þú samanburð á álíka eignum:

• Opnaðu verðflipann í dagatali skráningarinnar.
• Veldu allt að 31 daga tímabil. 
• Pikkaðu á skoða sambærilegar eignir.

Kort af svæðinu sýnir meðalverð sambærilegra eigna í nágrenninu miðað við staðsetningu, stærð og þægindi. Notaðu hnappana á kortinu til að sýna bókaðar eða óbókaðar eignir.

„Ég er alltaf að athuga hvort verðið hjá mér sé ekki örugglega samkeppnishæft og því vil ég vita hvað aðrir gestgjafar í nágrenninu eru að taka fyrir nóttina hjá sér,“ segir Felicity, ofurgestgjafi í Nýju-Suður Wales, Ástralíu. 

Með því að lækka verðið fyrir óbókaðar nætur eykur þú líkurnar á bókunum. Eignir með lægra verð miðað við aðrar í nágrenninu birtast yfirleitt ofar í leitarniðurstöðum.

Þú getur breytt verðinu í samræmi við tekjumarkmið þín hvenær sem er.

Það gæti komið sér vel að heimila gestum að bóka með styttri fyrirvara til að fylla dagatalið þegar minna er að gera. Þú getur stytt fyrirvarann til að bóka hjá þér eða sleppt því að taka frá undirbúningstíma fyrir og eftir bókanir í dagatalinu ef þú þarfnast hans ekki alltaf.

„Ég veit hvernig það er að vera á ferðalagi og þurfa á gistingu að halda á síðustu stundu. Það er ástæða þess að ég set ekki þak á hvenær einstaklingur getur sent mér bókunarbeiðni,“ segir Myranda, ofurgestgjafi í Little Rock, Arkansas. „Jafnvel þótt enginn sé bókaður fyrir næsta dag sé ég alltaf til þess að eignin sé hrein og tilbúin undir komu gesta.“

Svona breytir þú fyrirvara eða undirbúningstíma hjá þér:

• Opnaðu framboðsflipann í dagatali skráningarinnar.
• Opnaðu fyrirvari eða undirbúningstími.
• Veldu þann dagafjölda sem hentar þér.

Þú getur einnig heimilað beiðnir með skemmri fyrirvara en lágmarksfyrirvarinn hjá þér segir til um. Þú þarft að fara yfir og samþykkja þessar beiðnir handvirkt.

Gestgjafar fengu greitt fyrir að taka þátt í viðtölum.

Upplýsingarnar í þessari grein gætu hafa breyst frá birtingu.