Viðmiðunarreglur um að semja skráningartitil

Uppfærðu titilinn þinn til að sýna hvað eign þín hefur að bjóða í leitarniðurstöðum.
Airbnb skrifaði þann 17. jún. 2022
3 mín. lestur
Síðast uppfært 23. okt. 2023

Skráningartitillinn er eitt af því fyrsta sem birtist gestum í leitarniðurstöðum og veitir tækifæri á að undirstrika það sem gerir eignina einstaka. Fylgdu þessum viðmiðunarreglum um að semja skráningartitil þannig að skráningin þín veki athygli í leit, gefi gestum réttar væntingar og kveiki áhuga þeirra á að bóka eignina.

Stuttir titlar henta best

Þegar gestir leita á Airbnb nota þeir alls kyns tæki með skjáum af mismunandi stærðum. Skráningartitill sem kemur vel út í vafra gæti verið of langur fyrir gesti sem fletta í gegnum skráningar í appinu.

Með því að halda þig við 32 stafa hámark getur þú verið viss um að skráningartitillinn birtist í heild sinni, bæði á tölvu og fartækjum.

Hér eru þrjú góð dæmi um stutta skráningartitla:

  • Nútímaleg loftíbúð í miðbænum

  • Fjallaafdrep fyrir kokka

  • Villa í Año Nuevo við ströndina

Sé titill þinn lengri en 32 stafir skaltu hafa mikilvægustu upplýsingarnar fremst. Lengri titlar eru sjálfkrafa styttir í leitarniðurstöðum og eftirstandandi hluta titilsins er skipt út fyrir úrfellingarmerki. Titill eins og „Sveitakofi með útsýni yfir stöðuvatn, eldstæði og bátakví“ verður til dæmis að „Sveitakofi með útsýni yfir...“ í leitarniðurstöðum.

Haltu þig við hefðbundnar málfræðireglur

Hefðbundnar málfræðireglur gera ráð fyrir að hástafur sé aðeins notaður í upphafi setningar og það á einnig við skráningartitilinn. Þannig verður titillinn eðlilegri og einfaldari í lestri heldur en ef hástafir eru notaðir í upphafi bróðurparts orða eða ef titillinn er einungis ritaður með hástöfum.

Forðastu að nota hástaf í upphafi orða nema að um sé að ræða eiginlegt nafn eins og staðarnafn til að veita gestum betri leitarupplifun. Þú getur einnig gert undantekningar fyrir skammstafanir, svo sem RVK eða flugvallarheiti eins og KEF.

Hér eru þrjú góð dæmi um skráningartitla þar sem hástafir eru notaðir:

  • Strandskáli við Bondi-strönd

  • Rómantískt, viktorískt gestaherbergi

  • Umhverfisvæn stúdíóíbúð nálægt KEF

Orð eru skýrari en tjákn

Tjákn (emojis) og tákn geta valdið misskilningi eða verið villandi vegna þess að þau geta þýtt mismunandi hluti fyrir mismunandi fólki í kringum hnöttinn. „Þumalfingur upp“ getur til dæmis verið túlkaður sem samþykki, viðurkenning eða móðgun.

Haltu þig við einföld orð sem eru lýsandi fyrir eign þína til að skráningartitillinn verði auðlesanlegri. Það er í góðu lagi að nota sértákn (eins og !, # eða *) en ekki ef þau eru notuð til áhersluauka (eins og !!! eða ***). Prófaðu að nota kommur, bil eða stakt skástrik til að aðskilja hugtök.

Hér er dæmi um það sem ætti ekki að gera:

  • ****Skíða- & golfskáli****!!!

Hér er betri útfærsla:

  • Skíða/golfskáli með einkagarði

Nánari upplýsingar eru betri en endurtekningar

Í flestum tilvikum er ekki nauðsynlegt að endurtaka upplýsingar sem koma nú þegar fram í leitarniðurstöðum gesta eins og borg, bæ eða fjölda rúma. Nýttu frekar skráningartitilinn til að bæta við upplýsingum sem einkenna eignina og vekja athygli á henni.

Ef eignin er til dæmis staðsett í Buenos Aires gæti verið góð hugmynd að hafa nafn hverfisins, s.s. „Recoleta“, í skráningartitlinum. Ef hún er staðsett í Flórens á Ítalíu væri hægt að skrifa „í grennd við Uffizi“ eða annað kennileiti sem er nálægt eigninni. Sé sérstakt skrifstofusvæði í eigninni gæti verið góð hugmynd að koma hugtakinu „vinnuvænt“ fyrir í skráningartitlinum. Þetta hjálpar gestum að átta sig betur á mikilvægum upplýsingum.

Þú getur sleppt því að nota orðið „nýtt“ í skráningartitlinum vegna þess að slíkar upplýsingar birtast gestum á þar til gerðu merki í leitarniðurstöðum.

Lestu reglur Airbnb um efnisinnihald

Upplýsingarnar í þessari grein gætu hafa breyst frá birtingu.

Airbnb
17. jún. 2022
Kom þetta að gagni?