Umsagnir gesta og gestgjafa fyrir gistingu

Umsagnir skipta miklu máli við að byggja upp traust á Airbnb ásamt því að vera mikilvæg leið fyrir gestgjafa og gesti til að veita athugasemdir á báða bóga. Þær hjálpa einnig samfélagsmeðlimum okkar að taka upplýstar ákvarðanir við skipulagningu og vita hverju má gera ráð fyrir. Við teljum að sanngjarnt umsagnakerfi sé kerfi sem virðir og stendur vörð um heiðarlegar athugasemdir samfélagsmeðlima og við beitum ýmsum öryggisráðstöfunum til að hjálpa til við að byggja upp traust á umsagnakerfi okkar.

Hver getur gefið umsögn á Airbnb

Gestgjafar og gestir geta aðeins gefið umsagnir fyrir gistingu sem hefur verið bókuð og greidd á Airbnb.

Hvenær má senda inn og birta umsagnir

Gestgjafar og gestir hafa 14 daga frá útritun til að senda inn umsögn. Gestir og gestgjafar geta einnig gefið umsögn fyrir tilteknar bókanir sem felldar eru niður á innritunardeginum sjálfum eða síðar (á miðnætti á tímabelti skráningarinnar).

Umsagnir eru birtar þegar báðir aðilarnir hafa lokið sinni umsögn, eða að loknu 14 daga umsagnartímabilinu, hvort sem kemur fyrst.

Ef gestgjafi fellir niður bókun fyrir innritunardag getur hvorki gestgjafinn né gesturinn gefið dvölinni umsögn.

Svona gefur þú umsögn

Airbnb sendir þér tölvupóst að dvöl lokinni og biður þig um að gefa síðasta gestgjafa þínum eða gesti umsögn. Tölvupósturinn inniheldur hlekk á umsagnasíðuna til að þú getir deilt upplifun þinni af dvölinni með öðrum samfélagsmeðlimum. Ef þú finnur ekki hlekkinn í tölvupóstinum getur þú einnig skrifað umsögn beint á Airbnb:

• Ef þú ert gestur opnar þú ferðasíðuna þína eða innhólfið þitt á Airbnb
• Ef þú ert gestgjafi opnar þú bókanir í dagsflipanum eða innhólfið þitt á Airbnb

Hvar má nálgast eigin umsagnir

Þegar þú hefur skráð þig inn á aðgang þinn að Airbnb getur þú nálgast umsagnir sem þú hefur fengið og sem þú hefur gefið á opinberu notandalýsingunni þinni.

Er farið yfir umsagnir?

Airbnb fer ekki yfir umsagnir áður en þær eru birtar.

Umsagnir þurfa þó að vera heiðarlegar og tengjast raunverulegri bókun og gætu verið fjarlægðar ef þær brjóta gegn umsagnarreglum okkar. Í stuttu máli þýðir það að umsögn gæti verið fjarlægð í eftirfarandi tilvikum:

• Brjóti hún gegn reglum Airbnb um efnisinnihald. Þetta á til dæmis við ef umsögn inniheldur persónu- eða trúnaðarupplýsingar, felur í sér mismunun eða er ógnandi
• Sé hún hlutdræg. Það á til dæmis við ef gestur hefur fengið hvatningu til þess að skrifa jákvæða umsögn í skiptum fyrir gistingu án endurgjalds eða með afslætti eða þar sem merki eru um að bókun hafi eingöngu verið gerð í þeim tilgangi að hækka heildareinkunn viðeigandi aðila
• Endurspegli hún ekki beina upplifun, til dæmis ef hún lýsir ekki persónulegri reynslu af gestgjafanum, gestinum eða dvölinni sjálfri sem gagnast öðrum meðlimum samfélagsins að taka upplýstar ákvarðandir við bókun eða gestaumsjón.
• Sé hún skrifuð í hefndarskyni, til dæmis ef gestgjafi tilkynnir gest vegna alvarlegs brots á reglum og gesturinn skrifar í kjölfarið hlutdræga umsögn til að hefna sín á gestgjafanum.

Við styðjumst einnig við greiningarkerfi sem leitar eftir merkjum þess að umsögn tengist mögulega ekki raunverulegri dvöl. Ef kerfið greinir umsögn sem ber þess merki að vera fölsuð, til dæmis vegna þess að hún tengist ekki raunverulegri dvöl hjá Airbnb eða hún tengist bókun sem var aðeins gerð í þeim tilgangi að hækka einkunn viðeigandi aðila, verður hún fjarlægð.

Að fjarlægja umsögn

Þú getur ekki fjarlægt umsögn sem skrifuð er um þig en þú getur tilkynnt umsögnina til okkar ef þú telur hana brjóta gegn umsagnarreglunum. Umsagnir sem brjóta gegn umsagnarreglum okkar verða fjarlægðar og bæði gesturinn og gestgjafinn verða upplýstir um ákvörðunina þegar henni er framfylgt. Umsagnarreglunum er ætlað að standa vörð um umsagnakerfið okkar með því að fjarlægja umsagnir sem eru falskar, endurspegla ekki beina upplifun eða segja ekki rétt frá, en þó aðallega til að gera fólki kleift að deila reynslu sinni og skoðunum af tiltekinni dvöl með öðrum meðlimum samfélags okkar.

Þú getur fjarlægt umsögn sem þú birtir ef hún endurspeglar ekki lengur raunverulega upplifun þína sem gestur eða gestgjafi. Þú getur haft samband við þjónustuver okkar til að óska eftir að fjarlægja umsögn sem þú skrifaðir.

Að breyta umsögn

Við stuðlum að heiðarlegum og hlutlausum umsögnum með því að takmarka möguleika gestgjafa og gesta á að breyta umsögn eftir að hún hefur verið skrifuð.

• Ef þú ert fyrri til að senda inn umsögnina getur þú breytt henni hvenær sem er innan 14 daga umsagnartímabilsins eða þar til hinn aðilinn sendir inn sína umsögn
• Þegar báðar umsagnirnar hafa verið sendar inn eða 14 daga umsagnartímabilinu er lokið, hvort sem kemur á undan, verða báðar umsagnirnar sjálfkrafa birtar og þá verður ekki lengur hægt að breyta þeim
• Bæði umsagnir gesta og gestgjafa eru birtar samtímis og ekki er hægt að breyta þeim eftir að þær eru birtar (þar af leiðandi getur hinn aðilinn ekki lesið umsögnina þína og breytt eigin umsögn í kjölfarið)
• Þú getur ekki óskað eftir breytingum á umsögn sem skrifuð er um þig en þú getur haft samband við okkur til að óska eftir breytingu á því hvernig tiltekið persónufornafn er notað til að lýsa þér í umsögninni

Að svara umsögn

Þú getur sett inn opinbert svar við umsögn sem aðrir hafa skrifað um þig. Þér er velkomið að svara út frá eigin sjónarhorni og veita frekara samhengi svo lengi sem þú fylgir umsagnarreglum okkar.

Umsagnir um hópa

Ef bókun nær yfir fleiri en einn staðfestan gest mun umsögnin birtast á notandalýsingum allra staðfestu gestanna.

Birting umsagna, leit og röðun

Umsagnir birtast sjálfkrafa eftir tímaröð þannig að nýjasta umsögnin komi fram fyrst. Notendur geta einnig nýtt sér tól til að leita að og raða umsögnum eftir tilteknum þáttum. Með nýju og endurbættu umsagnarsíðunni getur þú nú nýtt þér tól til að flokka umsagnir eftir tímaröð, hæstu eða lægstu einkunn eða leitað með leitarorðum (s.s. hreinlæti, nethraða, staðsetningu o.s.frv.).

Svona flokkar þú umsagnir: 

Einkunnir umsagna

Stjörnugjöf tiltekins gests á bilinu ein til fimm stjörnur, fyrir dvölina í heild sinni, kemur fram við hverja umsögn. Við heildareinkunnina birtast stjörnueinkunnir fyrir undirflokka. Við sýnum einnig meðaleinkunn fyrir hvern af eftirfarandi undirflokkum: Hreinlæti, nákvæmni, innritun, samskipti, staðsetningu og virði. Svona eiga gestir betur með að vita hverju þeir gera ráð fyrir eftir að eignin er bókuð og gestgjafar fá betri innsýn á  það sem mætti bæta.

Nánari upplýsingar höfund umsagnar og tiltekna ferð

Til að ákvarða hvort tiltekið heimili henti þínum þörfum getur þú nálgast nánari upplýsingar um gestina sem gistu á heimilinu og gáfu umsögn fyrir, svo sem:

• Borgina, landið, heimsálfuna eða svæðið sem viðkomandi er frá
• Dvalardag (t.d.: Júní 2023, fyrir þremur vikum, í dag o.s.frv.)
• Tegund ferðar (t.d.: Dvaldi með börnum, hópi eða gæludýrum)
• Dvalarlengd (t.d.: Ein nótt, nokkrar nætur, um það bil vika eða rúm vika)

Gisting hjá Airbnb.org

Umsögnum fyrir gistingu hjá Airbnb.org er hagað á örlítið frábrugðinn hátt. Kynntu þér hvernig umsagnir fyrir gistingu hjá Airbnb.org ganga fyrir sig.